Премиерот Христијан Мицкоски, за време на денешната посета на Радовиш, изрази разбирање за граѓанските реакции и протестите кои се организираат по трагедијата во Кочани, при што животот го загубија 59 лица.
Одговарајќи на новинарско прашање, Мицкоски истакна дека ја почитува потребата на граѓаните да го изразат својот револт и болка, но предупреди дека, според него, зад некои од протестите стојат, како што рече, „политички глодари“ кои се обидуваат да ја искористат ситуацијата за свои цели.
„Сите ние сме незадоволни, и тука не треба да имаме дилема, работите ги решаваме и ќе продолжиме да ги решаваме. Многу работи се решија од оваа влада и за многу работи оваа влада беше браник. Тоа е проблем за политичките глодари кои гледаат шанса за некој поен преку овие протести. Преку ноќ не може ништо да се направи, поразивме неколку мафијашки здруженија, а ќе продолжиме и во периодот кој што ќе следи“, кажа Мицкоски.
