Неколку дена откако во јавноста се појавија реакции и прашања зошто не се огласил по повод трагедијата што ја потресе Кочани, поранешниот премиер Зоран Заев, преку неговата хуманитарна фондација, излезе со соопштение.
На официјалната веб-страница на фондацијата беше објавено дека донирале финансиски средства во висина од 150.000 денари на Црвениот крст на Република Македонија, со цел да им помогнат на семејствата на жртвите и повредените во катастрофалниот пожар. Сумата, која изнесува приближно 2.500 евра, е наменета како поддршка и олеснување за оние кои се најтешко погодени од оваа несреќа, објави „24инфо“.
„Со чувство на голема тага и болка од епилогот на големата трагедија која се случи на 16 март во Кочани, а во која згаснаа животите на 59 млади Македонци кои, за жал, не ја дочекаа новата пролет, Фондацијата „ЗАЕВ – Едно општество за сите“ им изразува искрено и длабоко сочувство на членовите на семејствата на починатите, а на сите повредени им посакува успешно опоравување и брзо враќање во нормалниот живот“, соопштија од Фондацијата.
Извор: 24инфо
