Владимир Блажев – Панчо, фронтменот на бендот ДНК, кој беше меѓу повредените во трагичниот пожар што избувна во дискотеката „Пулс“ во Кочани, се наоѓа во стабилна здравствена состојба.
Како што информираат од лекарскиот конзилиум при Клиничката болница „Аџибадем Систина“, каде што е хоспитализиран, неговата состојба е под контрола и во моментов не постои непосредна опасност по неговиот живот.
„Пациентот Владимир Блажев-Панчо од приемот до денес се наоѓа во единицата за интензивно лекување. На овој оддел се применува највисоко ниво на медицинска грижа. По спроведување на интензивното лекување, она што можеме да кажеме е дека пациентот е стабилен и дека во моментот е надвор од животозагрозувачка состојба. Неговото лекување продолжува во единицата за интензивна нега, во третманот е вклучен мултидисциплинарен тим лекари со цел да овозможат најдобра медицинска грижа“, велат од „Аџибадем Систина“ и нагласуваат дека информацијата за здравстената состојба на Панчо е дадена од страна на лекарскиот тим, кој е одговорен за неговиот третман и е единствена официјална информација потврдена од болницата, објавија голем број македонски медиуми.
