И покрај невидената трагедија што ја потресе цела Македонија, нечесните обиди за измами за жал не престануваат.
Воислав Дабевски, кој живее и работи во Осло, Норвешка, на социјалните мрежи ја сподели својата непријатна случка која предизвика бурни реакции кај јавноста. Тој искрено понудил помош за семејствата на настраданите и повредените од пожарот во дискотеката во Кочани. Но, наместо да налета на искрени луѓе, бил мета на измама — непознато лице се обидело да ја искористи трагедијата и да извлече пари од него под лажно претставување.
Овој обид за манипулација се случува во период кога постојат најави дека дел од повредените лица ќе бидат испратени на понатамошно лекување во странство, вклучително и во Норвешка.
Дабевски ја предупреди јавноста да биде внимателна и апелираше хуманоста да не се злоупотребува, особено во моменти на колективна болка и страдање.
