Министерот за здравство, Арбен Таравари, денеска ја сподели првата позитивна вест по трагичниот настан во Кочани, во кој животите ги загубија 59 млади лица, а речиси 200 беа повредени.
По катастрофалната несреќа, бројни пациенти беа хоспитализирани во болничките установи низ земјата и во странство, дел од нив со тешки телесни повреди и животозагрозувачка состојба.
Таравари соопшти дека изминаа најкритичните 72 часа од приемот на повредените пациенти, период кој лекарите го сметаат за клучен во процесот на стабилизација и преживување.
„Добрата вест е што поминаа 72 часа и нема ниту еден починат од тие што ја преживеаја трагедијата во Кочани. Вкупно, се третираат 178 пациенти низ различни здравствени установи, од кои што 64 се во болниците во Македонија во државните болници, и 13 пациенти се во приватните болници“, кажа Таравари.
