Бројот на хоспитализирани лица со изгореници, здобиени во трагичниот пожар што ја зафати дискотеката во Кочани, надминува 160 лица, вклучувајќи ги и пациентите примени во приватните здравствени установи.
Според последните информации, 16 пациенти се згрижени во приватни болници, а останатите се распределени низ јавните здравствени установи во земјава. Надлежните институции реагираа навремено и во рок од 24 часа успеаја да им пружат соодветна медицинска грижа на сите повредени.
Досега повеќе од 70 пациенти се успешно транспортирани на лекување надвор од земјава. Бидејќи капацитетите во болниците во соседните држави се речиси пополнети, од денеска дел од пациентите ќе бидат испраќани и во клинички центри во Италија, Холандија и Белгија.
