Тоше Богданов, 30-годишен жител на Кочани, трагично го загуби животот во кобниот пожар што ја зафати дискотеката „Пулс“. Несреќата се случила во моментот кога тој го славел најсреќниот настан во својот живот — раѓањето на својот син.
Богданов, по професија автомеханичар, бил познат во своето опкружување како посветен семеен човек. Заедно со својата сопруга, која пред неколку дена се породила, планирале заедничка иднина исполнета со радост и нови почетоци.
По веста за трагедијата, неговата сопруга се огласи преку социјалните мрежи, споделувајќи емотивни и потресни зборови за загубата на својот сопруг.
„Кога се изборивме за она што го сакавме, кога добивме причина за среќа и радост, животот ја покажа својата суровост. Зошто ги зема луѓето кои штотуку почнаа да живеат? Ќе бидам храбра мајка и ќе се борам за нашето мало ангелче да прерасне во човек како што беше ти – добар, храбар и силен. Кога ќе порасне и ќе ме праша: „Мамо, каде е татко ми?“ ќе му кажам да погледне во небото и да ја види најсветлата ѕвезда што сјае, а тоа ќе бидеш ти. А јас ќе бидам таа што секогаш ќе те сака, и никогаш нема да те заборавам. Нека ти е вечна слава, ти беше незаменлив човек“, напиша таа.
