Јавното обвинителство на Република Македонија најави дека ќе поднесе барање за определување мерка краткотраен притвор за десет лица кои се сомничат за можна одговорност во врска со пожарот што избувна синоќа во ноќниот клуб во Кочани. Ова вечерва го соопшти државниот јавен обвинител Љупчо Коцевски, заедно со обвинителскиот тим кој работи на истрагата.
По деталниот увид извршен денеска на местото на несреќата, јавните обвинители дошле до сериозни индиции за сериозни пропусти во безбедносните стандарди на објектот. Како што информира Коцевски, објектот не располагал со хидрантска мрежа, а бил опремен со само два противпожарни апарати. Дополнително, било утврдено дека вратата од заедничкиот простор била заклучена и без квака од внатрешната страна, што значително ја отежнало евакуацијата.
Исто така, во ентериерот биле употребени лесно запаливи материјали за звучна и визуелна изолација, кои не биле во согласност со прописите. Критичен момент било и користењето на пиротехнички средства на висина од три метри, без соодветна дозвола и без присуство на овластено лице за ракување со такви материјали.
Дополнително, објектот бил регистриран како деловен простор за лесна индустрија, без да биде извршена законска пренамена за угостителска дејност.
