Македонската музичка сцена е обвиена во тага по трагедијата што се случи во Кочани, оставајќи неизмерна болка и празнина зад себе. Андреј Ѓорѓиески, членот на популарниот состав „ДНК“ е меѓу 59-те жртви кои го загубија животот во кобниот пожар што ја зафати кочанската дискотека. Неговите најблиски, како и бројни уметници и љубители на музиката, се простуваат од него со емотивни зборови и спомени.
Меѓу нив и познатата пејачка Калиопи, која преку својот инстаграм-профил упати трогателна порака во чест на својот долгогодишен колега и пријател. Со кратка, но силно набиена објава, таа ја искажа својата болка и сочувство за загубата, оддавајќи почит кон ликот и делото на Андреј.
„Андреј, срцево ми се кине на сто парчиња, а душава парампарче. Твојата милост и убавина не изостанаа ни во последните мигови пред заминеш засекогаш, спасувајќи други животи. Ништо помалку не очекував од тебе, познавајќи ја твојата човечност, но не мораше вака. Ова не смее да е крај… чувствувам тага и бес, не смееше да е вака. Ќе те чувам заедно со нашите спомени, мило дете,“ напиша таа.
