Водителот на популарното музичко натпреварување „Ѕвездите на Гранд“, Војо Недељковиќ, потврди дека снимањето продолжува според претходно утврдената динамика и дека постојат конкретни планови за наредната сезона.
По трагичната загуба на креативниот директор на „Гранд“, Саша Поповиќ, кој почина на 1 март во приватна клиника во Париз и беше погребан на 6 март, многумина се прашуваа каква ќе биде иднината на музичкото шоу.
Во своето обраќање, Недељковиќ изјави дека тимот зад шоуто одлучил да ја продолжи работата, иако во знак на почит кон Поповиќ биле одложени две снимачки сесии. Тој откри дека тековната сезона ќе се заврши според предвидениот план со натпреварувачите што се веќе дел од шоуто, но воедно најави и можни промени за следната сезона.
„Во подготовка се нови концепти, меѓу кои можни измени во форматот на аудициите и воведување на нови правила. Сепак, прашањата за тоа кој ќе го води натпреварувањето, кој ќе биде дел од жирито и како ќе изгледаат новите изданија не се во моја надлежност“, изјави Недељковиќ.
