Македонија во моментов не е подготвена да испрати воени трупи во Украина како дел од мировна мисија, чија цел би била обезбедување стабилност во регионот. Според извори од Министерството за надворешни работи, оваа одлука е донесена имајќи предвид дека како членка на НАТО, земјата мора да избегне потенцијални безбедносни ризици од регионален аспект, пренесува „Дојче Веле“.
Во наредниот период, главниот приоритет ќе биде насочен кон безбедносните предизвици во регионот, како и на источниот и јужниот дел од НАТО. Исто така, сè уште не е донесена конечна одлука дали ќе продолжи воената помош што Македонија ѝ ја обезбедува на Украина за нејзината одбрана од руската агресија.
Официјалната позиција на државата останува непроменета – Македонија ја осудува воената интервенција на Русија во Украина. Сепак, според ставовите на МНР, дојдено е време за засилени дипломатски напори и поддршка на секоја иницијатива што ќе придонесе кон воспоставување мир.
