Министерот за земјоделство, шумарство и водостопанство, Цветан Трипуновски, изјави дека во текот на дводневниот македонско-унгарски владин самит во Будимпешта остварил значајна и конструктивна средба со неговиот унгарски колега, Иштван Наги, министер за земјоделство и рурален развој. На оваа средба било договорено продлабочување на билатералната соработка, особено во областа на науката и технолошките иновации во земјоделството.
Трипуновски нагласи дека разговорите биле фокусирани на актуелните предизвици со кои се соочуваат двете земји, како што се климатските промени и нивното влијание врз земјоделското производство.
Тој нагласи дека актуелниот фокус на Владата и Министерството за земјоделство е запирање на негативните трендови во производството и нивно постепено зголемување, особено кај основните култури, градинарските и полјоделските производи, како и сточарството. Дополнително, во план е да се иницира обновување на традиционалните, но подзаборавени култури на македонските ниви, како што се сончоглед, маслодајна репка, афион и памук.
„Верувам дека има потенцијал за враќање на овие култури, но клучниот предизвик е да се запре миграцијата од руралните средини и да се поттикнат младите земјоделци да останат и да ја продолжат традицијата на земјоделското производство. За тоа е потребна вистинска поддршка и почит кон оние кои ја хранат нацијата“, нагласи Трипуновски.
