Премиерот на Македонија, Христијан Мицкоски изрази надеж дека процесот на евроинтеграција на земјава конечно ќе се деблокира, при што особено ја нагласи значајната поддршка што ја добива Македонија од Унгарија.
Мицкоски, истакна дека земјата досега направила бројни отстапки, дури и на сопствена штета, особено во однос на македонскиот идентитет. Сепак, како што посочи, важно е да се остане оптимист и да се продолжи со борбата за евроинтеграцијата.
„Нашата цел мора да ја оствариме, иако сме свесни дека во минатото имаше и одредена домашна одговорност за состојбата во која се наоѓаме. Некои корумпирани политичари во земјава веруваа дека доколку безусловно прифаќаат сè што им се постави на маса, Брисел ќе им прогледа низ прсти за корупцијата, криминалот и уништувањето на државата. Со тоа, тие ја ослабуваа нашата преговарачка позиција од месец во месец, од година во година. Оваа влада нема да прави компромиси кога станува збор за вакви клучни прашања“, нагласи Мицкоски.
Тој додаде дека идниот ангажман ќе биде насочен кон зачувување на националните интереси, при што евроинтеграцијата ќе се темели на принципи и заштита на македонскиот идентитет, а не на еднострани отстапки.
