Советникот за национална безбедност на Белата куќа, Мајк Волц, во интервју за „Фокс њуз“ испрати јасна и остра порака до украинското раководство, повикувајќи ги властите во Киев да ја преиспитаат својата позиција и да го прифатат предложениот договор со САД.
Според извештајот на „Ројтерс“, договорот предвидува Украина да отстапи дел од своите рудни богатства во вредност од 500 милијарди долари како дел од економската соработка со САД. Волц нагласи дека украинската влада треба „да го намали тонот, добро да размисли и да го потпише договорот“, сугерирајќи дека Вашингтон очекува побрз и пофлексибилен пристап во преговорите.
Советникот остро реагираше на одредени критики од украинските власти за условите на договорот, потенцирајќи дека отпорот кон американскиот предлог е „неприфатлив“ со оглед на сè што САД направиле за поддршка на Украина.
