Од денеска стапува на сила владината одлука за ограничување на профитните маржи и замрзнување на цените, со што се намалуваат цените на повеќе од 1.000 производи и истата ќе важи до 30 април.
Оваа мерка, донесена со цел да се заштити стандардот на граѓаните, предизвика реакции кај трговците, кои изразија загриженост и побараа средба со премиерот Христијан Мицкоски и министерот за економија Бесар Дурмиши за да ги разгледаат можните последици врз пазарот.
Според одлуката, профитната маржа се ограничува на 5% за основните прехранбени производи како што се млекото, лебот, брашното, јајцата, маслото за јадење, јогуртот и киселото млеко.
За месото, шеќерот, млечните производи, оризот и тестенините максималната дозволена маржа изнесува 10%, додека за хигиенските производи, овошјето, зеленчукот и храната за бебиња ограничувањето е поставено на 15%.
