Сообраќајот на државните патишта се одвива во зимски услови, при што коловозите на одредени делници се влажни. На планинскиот премин Стража има намалена видливост до 100 метри поради појава на магла, информира Автомотосојузот на Македонија (АМСМ).
Од АМСМ воедно потсетуваат дека од 15 ноември 2024 година стапи на сила законската обврска за задолжително поседување зимска опрема во возилата, без разлика на актуелните временски услови. Ова правило ќе важи сè до 15 март 2025 година, со цел да се зголеми безбедноста на сите учесници во сообраќајот.
„Доколку не се почитуваат правилата за користење и носење зимска опрема во возилата, кои се предвидени во Законот за безбедност на патниот сообраќај, согласно истиот, на секој возач кој постапува спротивно на одредбите ќе му биде издаден платен налог со глоба во износ од 45 евра во денарска противредност“, пишува на страната на АМСМ.
