Синоќа избувна голем пожар во општина Врапчиште, зафаќајќи два магацински објекти каде што се чувал полиестер.
Според информациите од Регионалниот Центар за Управување со Кризи – Тетово, пожарот избувнал во магацин за производство на полиестер во селото Неготино. Објектот се состоел од три структури, од кои две се целосно уништени од огнената стихија, додека третиот е делумно оштетен.
Првите екипи на Територијалната противпожарна единица (ТППЕ) од Гостивар пристигнале на местото околу 00:45 часот, ангажирајќи девет пожарникари и три противпожарни возила во обид да го стават пожарот под контрола. Поради обемот на огнот, била побарана дополнителна помош од противпожарната единица во Тетово, од каде што пристигнале уште четворица пожарникари со едно возило. Овие екипи активно интервенирале до 04:00 часот.
За време на гаснењето на пожарот, еден пожарникар се здобил со повреди и бил пренесен во Ургентниот центар при Клиничката болница во Гостивар.
Пожарот бил ставен под контрола во раните утрински часови, околу 05:30, но поради преостанатиот чад, противпожарните екипи од Гостивар сè уште се на терен.
