Од Министерството за внатрешни работи (МВР) соопштија дека 35-годишниот Х.Б. од Скопје им подлегнал на повредите здобиени во престрелката што се случила синоќа.
Во инцидентот биле ранети уште двајца скопјани, меѓу кои и 35-годишниот А.Д., кој веднаш бил подложен на итна хируршка интервенција и задржан на лекување во Градската општа болница „Св. Наум Охридски“. Вториот повреден, 22-годишниот Н.Д., бил пренесен во Клиничкиот центар „Мајка Тереза“, каде што му била укажана медицинска помош.
Според достапните информации, жртвата на вооружениот напад е 35-годишниот Хебиб Буњаку, син на Екрем Буњаку, кој во минатото бил функционер на Демократската унија за интеграција (ДУИ) и во 2013 година ја извршувал функцијата директор на Државната техничка инспекција.
Според Министерството за внатрешни работи, првичните информации укажуваат дека инцидентот кој заврши со престрелка на паркинг во Чаир бил предизвикан од недоразбирање во сообраќајот.
Вербалната расправија меѓу две групи ескалирала во физичка пресметка, која подоцна прераснала во вооружен конфликт со фатални последици.
