Тешка сообраќајна несреќа со повеќе повредени лица се случи вчера околу 17 часот на магистралниот пат Охрид – Струга, во близина на крстосницата меѓу улиците „Мислешески пат“ и „Едвард Кардељ“ во Струга.
Според информациите од Министерството за внатрешни работи, во судирот учествувале две патнички возила – „Опел“ со струшки регистарски ознаки, управуван од 51-годишниот М.А. од Струга, и „Форд Фокус“ со скопски регистарски ознаки, кој бил во сопственост на МВР и управуван од 28-годишниот Д.П. од Скопје.
Во несреќата, со тешки телесни повреди се здобиле возачот на „Форд Фокус“ и сопатничката Д.Ј. (30) од селото Младо Нагоричане, Кумановско, кои воедно се полициски службеници. Повредите им биле констатирани во Специјалната болница „Св. Еразмо“ во Охрид, каде што биле пренесени за укажување на медицинска помош.
Покрај нив, уште еден полициски службеник, 27-годишниот Д.К. од Скопје, како и возачот на „Опелот“, М.А., исто така, се здобиле со телесни повреди. Тие биле пренесени во Општата болница во Струга, каде што им била укажана соодветна лекарска помош.
