Јавниот обвинител Љупчо Коцевски денеска одржа прес-конференција во врска со трагичниот случај на смртно прегазената Фросина Кулакова од Неготино, при што посочи дека инцидентот бил кривично дело извршено со умисла.
Против осомничениот, 20-годишниот Васил Јованов од Скопје, се води постапка за едно од најтешките кривични дела во областа на безбедноста на сообраќајот.
„Од досега собраните докази, Обвинителството е уверено дека станува збор за дело извршено со умисла. Затоа, против осомничениот водиме постапка за најтешко кривично дело во оваа област. Истрагата е во тек, а сите потребни дејствија за обезбедување на дополнителни докази продолжуваат“, изјави Коцевски.
Тој исто така изрази уверување дека постапката ќе биде спроведена на највисоко ниво, а Обвинителството ќе се залага за најстрога казна во случајот.
