Синоќа на булеварот „Партизански одреди“ во Скопје се случи тешка сообраќајна несреќа во која животот го загуби 22-годишна девојка. Според првичните информации, таа била удрена од автомобил што го управувал 20-годишен возач.
Како што соопшти Републичкото јавно обвинителство, од силниот удар девојката се здобила со тешки телесни повреди, поради кои починала на самото место. Дежурен јавен обвинител од Основното јавно обвинителство Скопје извршил увид на локацијата на несреќата, по што издал наредба за обдукција на телото на починатата.
Дополнително, надлежните органи издале наредби за прибавување и анализа на снимките од видеонадзорот во околината, со цел да се утврдат околностите под кои се случила несреќата. Дваесетгодишниот возач е приведен и задржан, а за него е издадена наредба за тестирање на присуство на алкохол и други супстанции во крвта и урината.
