Македонската ракометна репрезентација одигра нерешено против Австрија (29-29), откако Филип Кузмановски со одличен удар го совлада противничкиот голман.
Нашата ракометна репрезентација започна силно и доминираше во првите 20 минути од натпреварот, со водство од три гола разлика во два наврати (7-4 и 10-7). Сепак, противникот направи тактичка промена и го примени својот карактеристичен стил на игра „7 на 6“.
Во второто полувреме, „жолто-црвените“ делумно се адаптираа на оваа стратегија, а мечот стана борба гол за гол.
Најефикасен беше Марко Митев со шест гола, додека Филип Кузмановски придонесе со четири. Од противничкиот тим, Лукаш Хутечек беше најефикасен со шест погодоци.
