Македонската ракометна репрезентација обезбеди пласман во втората фаза на Светското првенство (СП) со победата над Гвинеја.
Капитенот Филип Кузмановски, кој се истакна како најдобар играч на натпреварот, ги сподели своите впечатоци за досегашниот настап на репрезентацијата на Мундијалот.
„Навистина сме среќни за денешниот натпревар и победата против Гвинеја, ова беше награда за напорната работа пред првенството. Одигравме квалитетен меч против Унгарија, но не нè посака среќата. Сите знаеме колку беше тешко да се пласираме на Мундијалот, ги победивме Фарски Острови и покажавме која е Македонија. Ветувам и верувам дека со момците ќе одиме чекор по чекор и ќе дадеме сè од себе. Се подготвуваме за дуелите против Австрија, Катар и Франција. Ќе ги анализираме противниците, мислам дека сме тактички подготвени и тоа го покажавме. Добро ги подготвуваме натпреварите, момците гинат за националниот дрес, покажаа како се игра за Македонија. Треба да покажеме зошто сме дојдени и како знаеме да играме“, кажа Кузмановски.
