Основното јавно обвинителство во Скопје, реагирајќи на вознемиреноста во јавноста предизвикана од објавената видео снимка која документира насилство врз куче во населбата Момин Поток, презеде итни дејствија по поднесувањето на кривичната пријава. Обвинителството ги собра сите релевантни докази и поднесе обвинение против две лица за извршување на кривично дело – „Убивање и мачење животни“, согласно член 233 став 1 од Кривичниот законик.
„Двајцата соизвршители на 19.11.2024 година го изложиле на непотребни маки и му нанеле непотребни болки, изложувајќи го на страдање кучето Феликс, мажјак, црна боја, на возраст околу една година. Првообвинетиот со тврд дрвен предмет во облик на стап и без оправдана причина започнал да го удира со повеќе удари кучето во пределот на главата и телото, нанесувајќи му тешки повреди. Потоа, заедно со второобвинетиот го врзале со жица и така врзано го влечеле по дворот до контејнер, каде го фрлиле мислејќи дека кучето е мртво. Како последица на повредите, кучето угинало на 07.01.2025 година.
Јавниот обвинител достави и предлог за определување мерка на претпазливост – задолжително јавување во Судот за двајцата обвинети, имајќи го предвид пред се објектот на инкриминацијата на ова кривично дело изразено преку заштита на животните од нехумано постапување“, се вели во соопштението на Обвинителството.
