Стопанската комора на Северозападна Македонија излезе со конкретен предлог како одговор на барањето на Сојузот на синдикати на Македонија за зголемување на минималната плата. Според предлогот на Комората, минималната плата би требало да се зголеми на 500 евра, но со услов придонесите да останат на нивото што важи за тековната минимална плата.
Овој став беше потврден од страна на претседателот на Комората, Менди Ќира, кој истакна дека ваквиот пристап би бил најефективно и долгорочно решение за прашањето на минималната плата.
„Нашиот став е јасен: минималната плата треба да изнесува 31.500 денари, а придонесите да останат на нивото на сегашната минимална плата. Веруваме дека ова е најсоодветниот начин да се обезбеди стабилност во овој сегмент за подолг временски период,“ изјави Ќира како одговор на новинарско прашање, пред состанокот кој попладнево го организираше Стопанската комора на Северозападна Македонија со претставници на Владата.
