Се продолжува потрагата по 56-годишниот А.А. од село Грчец, кој се верува дека бил во возилото што вчера излета од патот и заврши во реката Вардар, во близина на селото Рашче. Според изјавите на неговите роднини, А.А. бил патник во автомобилот пред несреќата.
Министерството за внатрешни работи (МВР) информира дека во потрагата се вклучени две беспилотни летала (дронови), како и екипи од Секторот за внатрешни работи Скопје и Одделот за специјални полициски операции. Пребарувањето на теренот и реката продолжува со цел да се лоцира исчезнатото лице.
Во меѓувреме, од полицијата ги потврдија и идентитетите на загинатите во оваа трагична сообраќајна несреќа. Животот го загубија три женски лица – Н.А. (23), В.А. (25) и З.А. (59), сите од село Грчец.
