Претседателот на Србија, Александар Вучиќ, во своето денешно обраќање до јавноста ја најави новата програма за станбени кредити за млади, која според него е една од најдобрите во Европа. Тој нагласи дека оваа иницијатива не е социјална мерка, туку стратегија за иднината на Србија, со цел поттикнување на младите да останат во земјата и да ја градат својата иднина тука.
„Ова е проект кој го сметам за најдобар начин за решавање на станбеното прашање, не само во Србија, туку и пошироко во Европа. Државата Србија обезбедува значителна поддршка, а целта не е само решавање на индивидуални проблеми, туку долгорочно градење на иднината на нашата земја,“ изјави Вучиќ, додавајќи дека програмата е насочена кон младите како носители на идниот развој.
Државата ќе субвенционира станови до 100.000 евра
Во рамките на програмата, државата ќе обезбеди субвенции за купување станови до максимална вредност од 100.000 евра. Деталите за максималната цена по квадратен метар ќе бидат дополнително утврдени, а младите ќе можат да изберат недвижности според своите потреби, како што се станови од 40 квадратни метри за 2.500 евра по квадрат или 60 квадратни метри за 1.600 евра по квадратен метар.
Услови на програмата
Програмата е достапна за млади од различни категории, вклучувајќи студенти од втора и трета година, млади професионалци и вработени во различни сектори. Клучните услови вклучуваат:
- Максимален износ на кредит: до 100.000 евра
- Учеството: само 1% од вредноста на кредитот
- Рок на отплата: до 40 години
- Максимална возраст за отплата: 70 години
- Предвремена отплата: без дополнителни трошоци
