Министерството за внатрешни работи потсетува дека крајниот рок за замена на регистарските таблички со нови кои ја содржат националната ознака „НМК“ или за поставување налепница со истата ознака е 31 декември 2024 година.
Оваа обврска се однесува на сите сопственици на возила чија регистрација е со таблички што ја содржат ознаката „МК“ (регистрации со четири броја) или на оние што немаат буквена ознака „МК“ (регистрации со три броја). Во овие случаи, граѓаните треба да ги заменат старите таблички со нови, кои ја вклучуваат ознаката „НМК“, или да залепат соодветна налепница на постојните таблички.
Налепниците со ознаката „НМК“ се достапни за набавка во сите станици за технички преглед ширум земјата. Министерството апелира до граѓаните навреме да ја исполнат оваа законска обврска со цел да се избегнат можни казни и административни проблеми по истекот на рокот.
