Во денешно време, кога во некои случаи работниците се експлоатираат до нечовечки граници, постојат и такви кои вистински се грижат за своите вработени и не ги гледаат како робови. Еден таков пример е Милисав Новичиќ, основач и сопственик на компанијата „Унипромет“ од Чачак, објави српски „Блиц“.
Неговата компанија вработува 660 луѓе, а тој одлучи да ги награди работниците со најдолг стаж во фирмата. Во чест на 35-годишнината од основањето на компанијата, Новичиќ им подари осум нови автомобили од марката „Рено“.
„Искрено, не се контролирав. Не ме интересираше што се случува кај другите. Ниту политиката ми беше важна. Секогаш се грижев за своите деца, за своите работници и за ‘Унипромет’. Овие работници се лојални, најдобри и такви ќе останат. И порано, работниците добиваа кредити за куќи и станови. Секогаш создавав атмосфера во која сите ќе бидат задоволни и ниту еден работник нема да може да ми рече дека се расфрлам додека нивните деца гладуваат. Тоа не смее да се случи“, изјави Новичиќ.
