Министерката за образование и наука, Весна Јаневска, денеска објави на својот Фејсбук профил дека Министерството предложило законски измени кои ќе овозможат интонирање на македонската химна во училиштата при одбележување на патронати, државни празници, како и на почетокот и крајот на учебната година. Според новите решенија, ова ќе се спроведува со согласност од локалните општини.
Јаневска истакна дека химната е еден од најважните симболи на секоја земја и дека таа треба да се пее со гордост и почит. Таа додаде дека во сите земји химната се изведува со почит, а интонирањето на химната носи силна порака за заедништво и патриотизам.
„Македонија има свои државни симболи – химна, грб и знаме и секој граѓанин треба да ги знае и почитува. Како што и доликува. Мене ми е чест што како министерство предложивме законски решенија кои овозможуваат опција за време на патронат, државен празник, на почеток и на крај на учебната година, во училиштата да се интонира македонската химна со согласност од општините. Во секоја земја, химната се пее гордо и со рака на срце! Тоа нешто значи. Освен запознавање на младите со овој државен симбол, се придонесува за развивање на љубовта и за јакнење на почитта на најмладите граѓани кон сопствената земја. Утре, тие ќе ја водат државата. А кон каква иднина би ја воделе, доколку не ја сакаат и почитуваат? Очекувам мнозинството пратеници во македонското Собрание да ги поддржат законите. Сметам дека сепак, сите треба да придонесеме за младите да се едуцираат во духот на овие вредности“, вели Јаневска.
