Под мотото за здрава животна средина, денеска во 16:00 часот ќе се одржи протестен марш за чист воздух, организиран од иницијативата „Зелен Хуман Град“.
Маршот ќе започне пред Министерството за животна средина и просторно планирање, ќе продолжи со протестни активности пред Собранието, а ќе заврши со собир пред Владата на Република Македонија.
Организаторите истакнуваат дека овој протест е повик за итна акција во борбата против загадувањето и за заштита на основното право на граѓаните – чист и здрав воздух. Целта е да се поттикнат институциите да преземат конкретни мерки за подобрување на состојбата со квалитетот на воздухот во земјата.
„Протестираме бидејќи секоја година во Македонија се бележат околу 3.828 смртни случаи предизвикани од изложеност на честичките PM2.5, кои се меѓу најштетните за здравјето. Тоа изнесува 17.7% од вкупната смртност во државата. Овие честички се поврзани со широк спектар на здравствени проблеми, како што се белодробни заболувања, срцеви удари и рак на белите дробови.
Особено загрижувачки е дека еден од девет смртни случаи кај деца до една година во Македонија е поврзан со загадениот воздух! Загадувањето во Скопје и другите градови во Македонија со години е проблем на сите жители, а со тоа и на секоја власт. Колку побрзо се почне со спроведување мерки кои меѓусебно се надополнуваат и си го зголемуваат позитивниот ефект врз квалитетот на воздухот – толку побрзо ќе го решиме овој долгогодишен проблем. Сѐ што треба е само да дојдете и да застанеме рамо до рамо за чист воздух! Скопје мора да дише! Македонија мора да дише! Се гледаме на улица“, се вели во апелот.
