Израел извел напади врз десет складишта за оружје и воени објекти во региони на Сирија кои се под контрола на групи што го соборија режимот на владејачката партија БААС и Башар ал Асад, пренесуваат регионалните медиуми. Иранската агенција ИРНА тврди дека израелските сили влегле на југот на Сирија, при што „Израел извршил инфилтрација“, со што, како што се наведува, го прекршил „суверенитетот и територијалниот интегритет“ на земјата.
Според информации на агенцијата Анадолија, која се повикува на опозициски извори поврзани со набљудување на воздушниот простор, израелски воени авиони ги гаѓале воениот аеродром Мезех во Дамаск, областите Кунеитра, Минкет ал Хадаб, безбедносната зона, како и неколку други локации, меѓу кои и воената база Калкале, Тел ал Талиб во Дараја и повеќе објекти во градот Гита.
Целите на нападите биле стратешки воени објекти и складишта за оружје, информира Анадолија.
