Писмо напишано од реномираниот австриски композитор Волфганг Амадеус Моцарт во 1783 година било продадено на онлајн аукција за извонредни 440.000 евра.
Купувачот, приватен колекционер од Европа, успеал да го добие писмото по наддавање кое ја надминало почетната цена од 100.000 евра повеќе од четирикратно, според соопштението на аукциската куќа International Autograph Auctions Europe, со седиште во Малага, Шпанија.
Интересот за ова историско писмо бил огромен, особено меѓу колекционерите од САД и Азија, потврдила аукциската куќа.
Писмото, напишано на германски јазик, било адресирано до францускиот издавач Жан-Жорж Зиберт и долго време се сметало за изгубено. Според изјавите на организаторите на аукцијата, документот бил случајно откриен во семејна архива, што дополнително ја зголемило неговата историска и емоционална вредност.
