Портпаролката на руското Министерство за надворешни работи, Марија Захарова, денеска јавно постави прашање дали Западот ќе преземе санкции против Јужна Кореја, поради одлуката за прогласување на воена состојба и блокирање на влезот во парламентот на земјата.
„Што ќе одлучат Литванија, Латвија и Естонија во врска со ова? Дали ќе воведат санкции против Сеул? Или можеби Јужна Кореја ќе има повеќе среќа од Грузија?“ изјави Захарова на својот официјален канал на Телеграм, критикувајќи го, како што го нарече, „двојниот аршин“ на Западот.
Претседателот на Јужна Кореја, Џун Сук-Јол, претходно денес објави воведување на воена состојба во земјата, со цел „искоренување на про-севернокорејските сили и заштита на слободата и уставниот поредок“. Во рамки на мерките, активностите на парламентот, политичките партии и здруженијата во Јужна Кореја се привремено суспендирани додека трае воената состојба.
Русија, преку Захарова, ја искористи ситуацијата за да го нагласи, според нејзиното мислење, пристрасниот однос на Западот кон различни кризни ситуации во светот, повикувајќи на консистентност во примената на санкции и мерки.
