Шеснаесетгодишниот танчер Анди Исмаили од Гостивар повторно се запиша во историјата на светскиот танц, освојувајќи го златото на Светското првенство во танцување што се одржа во Киелце, Полска. Со оваа победа, Анди го освои својот петти светски шампионски наслов, демонстрирајќи исклучителен талент, посветеност и страст кон уметноста на танцот.
Анди се истакнува како еден од најперспективните млади танчери на својата генерација, благодарение на долгогодишната работа со неговата менторка Андријана Петковски, која одигра клучна улога во развојот на неговите вештини. За кореографијата на овој успешен настап се погрижи креативната кореографка Карол Ментол од Полска, чиј уметнички пристап му помогна на Анди да го истакне својот уникатен стил и енергија на сцената.
„Во кабинетот на Министерството за култура и туризам лично му честитав за неверојатниот успех – светски шампион во танцување! По петти пат да се искачиш на врвот на светот е не само големо достигнување, туку и сведоштво за неговата посветеност, талент и напорна работа. Сигурен сум дека ова е само почеток на неговата успешна кариера. Анди продолжи да танцуваш со истата страст и посветеност, и знај дека целиот свет е пред тебе“, објави министерот Зоран Љутков.
