По трагедијата во која шест туристи го загубија животот, најверојатно поради труење со метанол, властите во Лаос презедоа итни мерки и уапсија осум вработени во хостелот „Нана Бакер“, кој се наоѓа во туристичкото место Ванг Виенг. Уапсените, на возраст од 23 до 44 години, се задржани на распит како дел од тековната истрага, известува „Скај Њус“.
Според изјавата на менаџерот на хостелот, Дуонг Дук Тоан, двете жртви од Австралија два дена пред инцидентот учествувале во настан организиран за гостите на хостелот, каде се служеле бесплатни чаши локално произведена лао вотка како гест на гостопримство. Тој нагласи дека повеќе од 100 гости присуствувале на настанот, но досега никој друг не пријавил здравствени проблеми. По настанот, двете жени излегле во град и се вратиле во раните утрински часови.
Сè уште не е утврдено во кој момент туристите ги консумирале пијалоците што се сметаат за потенцијално контаминирани со метанол. Инцидентот предизвика сериозна загриженост, бидејќи метанолот, токсична супстанција, може да се најде во фалсификувани алкохолни производи, кои често се служат во туристичките места.
Хостелот „Нана Бакер“ е привремено затворен додека полицијата ја продолжува истрагата. Властите во Лаос апелираа до локалните угостителски објекти да се воздржат од нелегална дистрибуција на алкохол и да соработуваат со инспекциите за да се спречи понатамошна опасност за посетителите.
