Состојбата во голем дел од ученичките и студентските домови е во катастрофална состојба, наследена од претходната Влада, изјави министерката за образование и наука, проф. д-р Весна Јаневска, одговарајќи на пратеничко прашање во Собранието.
Таа истакна дека во одредени домови постојат сериозни сомневања за криминални активности, поради што ќе бидат преземени соодветни правни чекори за да се побара одговорност од поранешните директори.
„Посебно алармантна е состојбата во студентскиот дом „Пелагонија“ во Скопје. Во домот недостасува топла вода и храна, а вработените со месеци не земале плата поради акумулираниот долг од 34 милиони денари. За да спречиме целосен колапс, интервентно издвоивме 5 милиони денари, што овозможи исплата на платите и обезбедување на здравствено осигурување за вработените,“ изјави Јаневска.
Таа додаде дека државниот ревизор утврдил значителни неправилности во работењето на претходната Влада, особено во однос на ученичкиот и студентскиот стандард.
Министерката ја истакна и апсурдната ситуација со управувањето на домот, каде директорот набавувал пилешко месо на големо по цена од 570 денари за килограм, иако во малопродажба истото се продавало за 270 денари.
„И покрај овие прекумерни трошоци, студентите се жалеле дека не добивале доволна количина на храна,“ посочи Јаневска, дополнувајќи дека овие и други откриени злоупотреби ќе бидат предмет на понатамошна истрага.
