Изрекувањето на пресудата за Урош Блажиќ (21), кој е обвинет дека во мај минатата година, без никаква причина, убил девет лица и тешко повредил уште 12, е закажано за 12 декември во 10 часот во Специјалниот суд. Покрај Урош, пресуда ќе му биде изречена и на неговиот татко, Радиша Блажиќ. Денеска двајцата дадоа завршни зборови пред изрекувањето на судската одлука.
Урош Блажиќ, придружуван од чувари, застанал пред говорницата и во десетминутното излагање повторил дека е виновен за масакрот, потврдувајќи го она што го изјавил претходно.
„Она што се случи заслужува најголема осуда. Се согласувам со тоа. Нема искупување за овие гревови што ги направив. Да можев да ги искупам гревовите, тоа ќе беше добро. Не можев да си го одземам животот по злосторството, можеби затоа што сум кукавица, а можеби и затоа што сум верник. Сакам да кажам дека не сум пребарувал на интернет дали сум малолетник. Не сум планирал никаков терористички напад – тоа не е точно. Многу ми е жал што нашиот закон е таков и што не можам да бидам казнет на начин како што заслужувам. Сето ова требаше да се заврши со краток процес. Не се оправдувам, но навистина не знам зошто го направив тоа. Жал ми е што не живееме во постари времиња, кога би ме стрелале за она што го направив. Ќе се свртев кон тој ѕид без збор, без да изустам ни ’А‘. Што се однесува до мојот татко, вие сакате да го осудите, а тој не знаеше ништо за ова. Тој е одликуван офицер на Војската на Србија. Ве молам, бидете благонаклонети кон него затоа што тој нема никаква врска со злосторството. Јас сум виновен, јас го направив тоа, не тој. Мојот татко никогаш не бил осудуван и тоа треба да се знае“, изјавил Блажиќ.
