На граничниот премин Табановце, синоќа бил приведен 32-годишниот В.А. од Република Албанија, откако кај него биле откриени 3.622 монети со значајна археолошка вредност.
Како што соопшти полицијата, при рутинска контрола на автобус со албански национални ознаки, кој сообраќал на релација Албанија – Италија, В.А. бил селектиран за дополнителна проверка. Во неговиот багаж, полициските службеници откриле три кеси полни со монети, кои се различни по облик, големина и потекло. Монетите, според првичните проценки, претставуваат археолошки значајни артефакти.
„По откривањето на монетите, беше извршен службен разговор со лицето В.А., а случајот беше веднаш пријавен кај јавен обвинител. На негово барање, монетите беа одземени за понатамошна истражна постапка,“ информираа од полицијата.
В.А. е предаден на полициски службеници од СВР Куманово за понатамошна обработка на случајот. По целосното документирање на настанот, против него ќе биде поднесена соодветна кривична пријава согласно член 265 од Кривичниот законик, кој се однесува на незаконско постапување со културно наследство.
