Со сослушување на родителите на обвинетиот Александар Ѓорчевски, по предлог на Јавното обвинителство, денеска во Основниот кривичен суд во Скопје продолжи судењето за двојното убиство на малолетната Вања Ѓорчевска и велешанецот Панче Жежовски.
На денешното рочиште, меѓу сведоците беа сестрата на Александар, Оли Нешковиќ, нејзините родители, синот, како и членови на семејството на Гоце Трајковски.
Во својот исказ, Иво Нешковиќ, братучед на Вања, објасни дека на барање на Александар, кој бил под огромен стрес, се обидел да контактира со Илон Маск, надевајќи се дека тој може преку сателит да ја пронајде исчезнатата Вања.
„Си знаев дека е малку веројатно Илон Маск да ми одговори на мене, Иво од Скопје, но му пишав само за да го смирам вујко ми, кој беше во страшна агонија,“ сведочеше Иво Нешковиќ. Тој додаде дека, како што очекувал, не добил одговор на неговото барање.
