Министерот за внатрешни работи, Панче Тошковски, во рамките на платформата „100% посветени за тебе“ на тема „Фокус на правдата, безбедноста и одбраната“, која се одржа денеска во Владата, одговори на прашањето за времето на пуштање во употреба на системот за безбеден град „Сејф сити“. Тој изрази надеж дека системот ќе биде целосно функционален во текот на 2025 година.
Тошковски објасни дека претходните власти извршиле набавка на технологијата, но не создадоа стратешки план за нејзиното имплементирање, ниту ги завршија законските процедури за точно одредување на местата каде ќе се примени, како и начините на кои ќе се испорачаат казните и дали судовите ќе можат да се справат со масивниот број на предмети што ќе настанат како резултат на примената на овој систем.
„По завршувањето на техничката влада и формирањето на новата, редовна влада, го посветив целото внимание на овој проект, бидејќи сметам дека бројките кои ги имаме – 146, 126, 138 – се трагични, а тие се бројките на луѓе кои го загубиле животот како резултат на сообраќајни несреќи. Нашата цел е да ги намалиме овие бројки. Секој живот има огромна вредност и треба да направиме сè што е во наша моќ за да го спречиме губењето на човечки животи. Иако би сакал да започнеме со работа на системот во јануари 2025, поради сите потребни чекори што треба да се реализираат, ќе биде тешко да го постигнеме тоа. Би бил задоволен ако системот биде целосно функционален во текот на 2025 година“, нагласи Тошковски.
Министерот Тошковски појасни дека во периодот на започнување на системот, граѓаните ќе бидат предупредувани преку софтверското решение, со што ќе имаат можност да се информираат за бројот на прекршоци кои ги направиле во однос на управувањето со моторни возила и другите сообраќајни правила.
„Системот ќе регистрира прекршоци како што се минување на црвено светло, возење со пречекорување на дозволената брзина и непрописно паркирање, со крајна цел да се подобри сообраќајната култура и да се намалат сообраќајните несреќи со човечки жртви“, додаде Тошковски.
