Минималната плата во Федерацијата Босна и Херцеговина сега изнесува 619 конвертибилни марки (приближно 310 евра), но наскоро ќе се зголеми на 1.200 марки. Во исто време, се воведува нов систем за фискализација, кој ќе ја засили контролата врз финансиските трансакции и ќе придонесе во борбата против даночното затајување.
Во Македонија, синдикатот е непопустлив во своето барање за зголемување на минималната плата, како и на сите останати плати. Тие инсистираат на итно покачување, со минимална плата која нема да биде помала од 27.600 денари (околу 450 евра).
Синдикатот бара Владата што поскоро да го свика Социо-економскиот совет и да не се обидува вештачки да ја намали инфлацијата со цел да го намали износот на покачувањето. Според законските одредби, минималната плата треба да се зголеми до март 2024 година, а пресметките покажуваат дека зголемувањето треба да биде околу 1.800 денари, во согласност со растот на трошоците за живот и просечната плата.
„Очекувам дека на крајот на ноември или почетокот на декември министерот за економија ќе го закаже состанокот на Социо-економскиот совет, каде ќе се утврди дали Владата има политичка волја за зголемување на минималната плата пред Нова Година. Доколку сакаме да ја зачуваме куповната моќ на работниците, платите мора да растат. Не може да се очекува зголемување на продуктивноста со плати од 400 или 450 евра. Март е предалеку, и не треба да чекаме до тогаш. Можеби до март нашите барања ќе бидат и за минимална плата над 450 евра,“ изјави Иван Пешевски, потпретседател на ССМ, за телевизијата „Сител“.
