По трагичниот инцидент во Нови Сад, каде што падна натстрешница пред железничката станица и однесе најмалку 14 животи, меѓу кои и еден македонски државјанин, градежниот инженер и граѓански активист Данијел Дашиќ понуди своја техничка анализа на причините за инцидентот.
Според неговото објаснување, катастрофата се случила поради неусогласена интервенција врз постоечката бетонска конзола.
„На постоечката армирана бетонска конзола, која била прицврстена со челични профили, додадена е нова челична конструкција со тешки стаклени елементи. Токму таа дополнителна тежина предизвикала корнење на анкерите и кршење на конзолните носачи. Паниката и приказните дека натстрешницата не била реконструирана се неосновани,“ објави инженерот Дашиќ преку својот профил на социјалната мрежа „Икс“.
Оваа трагедија ги поттикна надлежните органи во Србија да започнат детална истрага за утврдување на одговорноста и дали имало пропусти во дизајнот и изведбата на дополнителната конструкција.
Истрагата треба да даде јасен одговор за тоа дали било почитувано градежното законодавство и стандардите за безбедност.
